ਨਵੀਂ ਦਿੱਲੀ
(ਜਸਟਿਸ ਨਿਊਜ਼ )
ਰਾਸ਼ਟਰੀ ਗੌਧਨ ਮਹਾਸੰਘ ਵੱਲੋਂ 5 ਨਵੰਬਰ ਤੋਂ 10 ਨਵੰਬਰ ਤੱਕ ‘ਆਤਮਨਿਰਭਰ ਭਾਰਤ’ ਬਣਾਉਣ ਲਈ ‘ਮੇਜਰ ਧਿਆਨਚੰਦ ਨੈਸ਼ਨਲ ਸਟੇਡੀਅਮ’, ਨਵੀਂ ਦਿੱਲੀ ਵਿੱਚ ‘ਇੱਕ ਵਿਚਾਰਾਤਮਕ ਅਹਿੰਸਕ ਅੰਦੋਲਨ’ ਚਲਾਇਆ ਜਾ ਰਿਹਾ ਹੈ। ਇਸ ਦਾ ਸ਼ੁਭਾਰੰਭ ਵਰਤਮਾਨ ਨਾਮਧਾਰੀ ਸਤਿਗੁਰੂ ਦਲੀਪ ਸਿੰਘ ਜੀ ਮਹਾਰਾਜ ਦੇ ਆਸ਼ੀਰਵਾਦ ਅਤੇ ਮਾਰਗਦਰਸ਼ਨ ਹੇਠ ਸ੍ਰੀ ਸਤਿਗੁਰੂ ਨਾਨਕ ਦੇਵ ਜੀ ਦਾ ਪ੍ਰਕਾਸ਼ ਪੁਰਬ ਮਨਾ ਕੇ ਕੀਤਾ ਗਿਆ। ਇਸ ਸਮਾਗਮ ਦੀ ਮੁੱਖ ਅਧਿਅਕਸ਼ਤਾ ਸ਼੍ਰੀ ਸਤਿਗੁਰੂ ਦਲੀਪ ਸਿੰਘ ਜੀ ਦੀ ਪੁੱਤਰੀ ਸੁਸ਼੍ਰੀ ਜੀਵਨ ਕੌਰ ਜੀ ਨੇ ਕੀਤੀ। ਇਸ ਮੌਕੇ ਉੱਤੇ ਹਰਿਆਣਾ ਦੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਨੀ, ਵਿਸ਼ਵ ਹਿੰਦੂ ਪਰਿਸ਼ਦ ਦੇ ਅੰਤਰ-ਰਾਸ਼ਟਰੀ ਅਧਿਅਕਸ਼ ਸ਼੍ਰੀ ਆਲੋਕ ਕੁਮਾਰ, ਨਵੀਂ ਦਿੱਲੀ ਤੋਂ ਲੋਕ ਸਭਾ ਸੰਸਦ ਮੈਂਬਰ ਸੁਸ਼੍ਰੀ ਬਾਂਸੁਰੀ ਸਵਰਾਜ ਜੀ, ਸਿਰਸਾ ਤੋਂ ਸਾਬਕਾ ਸੰਸਦ ਮੈਂਬਰ ਸੁਸ਼੍ਰੀ ਸੁਨੀਤਾ ਦੁੱਗਲ ਜੀ, ਸਵਾਮੀ ਸੁਧਾਂਸ਼ੂ ਜੀ ਮਹਾਰਾਜ, ਸ਼੍ਰੀ ਸਤੀਸ਼ ਤਨੇਜਾ, ਅਤੇ ਇਸ ਸ਼ਿਖਰ ਸੰਮੇਲਨ ਦੀ ਸੰਯੋਜਕ ਸਮੇਤ ਹੋਰ ਸਾਰੇ ਸਨਮਾਨਯੋਗ ਹਸਤੀਆਂ ਹਾਜ਼ਰ ਸਨ।
ਬੀਬੀ ਜੀਵਨ ਕੌਰ ਜੀ ਨੇ ਗਊ ਦੀ ਮਹੱਤਤਾ ਬਾਰੇ ਦੱਸਦਿਆਂ ਕਿਹਾ ਕਿ ਭਾਰਤੀ ਸਭਿਅਤਾ ਵਿੱਚ ਸ਼ੁਰੂ ਤੋਂ ਹੀ ਗਊ ਦੀ ਮਹੱਤਤਾ ਰਹੀ ਹੈ। ਗਊ ਦੇ ਉਸੇ ਮਹੱਤਵ ਨੂੰ ਪੁਨਰ ਜਾਗਰਿਤ ਕਰਨ ਲਈ ਇਸ ਸਮਾਗਮ ਦਾ ਆਯੋਜਨ “ਰਾਸ਼ਟਰੀ ਗੌ-ਧਨ ਸੰਘ” ਵੱਲੋਂ ਗੁਰੂ ਨਾਨਕ ਦੇਵ ਜੀ ਦੇ ਪ੍ਰਕਾਸ਼ ਪੁਰਬ ਮਨਾ ਕੇ ਕੀਤਾ ਗਿਆ ਹੈ। ਗਊ ਨੂੰ “ਮਾਤਾ” ਦੇ ਸਮਾਨ ਮੰਨਿਆ ਗਿਆ ਹੈ, ਇਸ ਕਰਕੇ ਇਸ ਨੂੰ “ਗਊ ਮਾਤਾ” ਵੀ ਕਿਹਾ ਜਾਂਦਾ ਹੈ। ਗਊ ਸਿਰਫ਼ ਹਿੰਦੂਆਂ ਲਈ ਹੀ “ਮਾਤਾ” ਨਹੀਂ ਹੈ ਅਤੇ ਨਾ ਹੀ ਸਿਰਫ਼ ਹਿੰਦੂਆਂ ਲਈ ਹੀ ਗਊ ਦੀ ਸੇਵਾ ਜਾਂ ਰੱਖਿਆ ਕਰਨੀ ਜ਼ਰੂਰੀ ਹੈ। ਗਊ ਸੇਵਾ ਤੇ ਗਊ ਰੱਖਿਆ ਨੂੰ ਸਾਰੇ ਭਾਰਤੀ ਧਰਮਾਂ ਵਿੱਚ ਮਹਾਨ ਕੰਮ ਮੰਨਿਆ ਗਿਆ ਹੈ। ਭਾਰਤੀ ਸਭਿਅਤਾ ਤੋਂ ਉਪਜੇ ਚਾਰ ਧਰਮ — ਸਨਾਤਨ ਹਿੰਦੂ, ਸਿੱਖ, ਜੈਨ ਅਤੇ ਬੌਧ — ਵਿੱਚ ਗਊ ਦੀ ਸੇਵਾ ਨੂੰ ਮਹਾਨ ਮੰਨਿਆ ਗਿਆ ਹੈ।
ਬੀਬੀ ਜੀਵਨ ਕੌਰ ਜੀ ਨੇ ਦੱਸਿਆ ਕਿ ਸਤਿਗੁਰੂ ਨਾਨਕ ਦੇਵ ਜੀ ਦੇ ਸਿੱਖ ਪੰਥ ਨੇ ਗੌ-ਧਨ ਦੀ ਰੱਖਿਆ ਲਈ ਬਹੁਤ ਵੱਡੇ ਕਾਰਜ ਕੀਤੇ ਹਨ। ਇਥੋਂ ਤੱਕ ਕਿ ਗੌ-ਧਨ ਦੀ ਰੱਖਿਆ ਅਤੇ ਵਾਧੇ ਲਈ ਨਾਮਧਾਰੀ ਸਿੱਖਾਂ ਨੇ ਸਭ ਤੋਂ ਵੱਧ ਬਲਿਦਾਨ ਦਿੱਤੇ ਹਨ। ਅੰਮ੍ਰਿਤਸਰ, ਰਾਇਕੋਟ ਵਿੱਚ ਨਾਮਧਾਰੀ ਸਿੱਖਾਂ ਨੂੰ ਫਾਂਸੀ ਦੇ ਦਿੱਤੀ ਗਈ ਸੀ। ਮਲੇਰਕੋਟਲਾ ਵਿੱਚ ਬਿਨਾ ਮੁਕੱਦਮਾ ਚਲਾਏ 66 ਨਾਮਧਾਰੀ ਸਿੱਖਾਂ ਨੂੰ ਤੋਪਾਂ ਨਾਲ ਉਡਾ ਦਿੱਤਾ ਗਿਆ ਅਤੇ ਇੱਕ ਨੂੰ ਤਲਵਾਰ ਨਾਲ ਸ਼ਹੀਦ ਕਰ ਦਿੱਤਾ ਗਿਆ ਸੀ।
ਨਾਮਧਾਰੀ ਪੰਥ ਬਾਰੇ ਸੰਖੇਪ ਜਾਣਕਾਰੀ ਦਿੰਦਿਆਂ ਬੀਬੀ ਜੀਵਨ ਕੌਰ ਜੀ ਨੇ ਦੱਸਿਆ ਕਿ ਸਤਿਗੁਰੂ ਰਾਮ ਸਿੰਘ ਜੀ ਨੇ ਸਿੱਖੀ, ਆਤਮ-ਸਨਮਾਨ, ਸਮਾਜ ਸੁਧਾਰ ਅਤੇ ਦੇਸ਼ ਦੀ ਆਜ਼ਾਦੀ ਲਈ 1857 ਈ. ਵਿੱਚ ਵੈਸਾਖੀ ਦੇ ਦਿਨ ਨਾਮਧਾਰੀ ‘ਸੰਤ ਖ਼ਾਲਸਾ’ ਦੀ ਸਥਾਪਨਾ ਕੀਤੀ ਸੀ। ਉਨ੍ਹਾਂ ਨੇ ਔਰਤਾਂ ਨੂੰ ਅੰਮ੍ਰਿਤ ਪਾਨ ਕਰਵਾਇਆ, ਦਹੇਜ-ਮੁਕਤ, ਅੰਤਰਜਾਤੀ ਅਤੇ ਸਮੂਹਿਕ ‘ਗੁਰਮਤਿ ਆਨੰਦ ਕਾਰਜ ਮਰਯਾਦਾ’ ਦੀ ਸ਼ੁਰੂਆਤ ਕੀਤੀ, ਬਾਲ ਵਿਆਹ ਰੁਕਵਾਏ। ਉਨ੍ਹਾਂ ਨੇ ਗਾਂਧੀ ਜੀ ਤੋਂ 50 ਸਾਲ ਪਹਿਲਾਂ ਅਸਹਿਯੋਗ ਅੰਦੋਲਨ ਅਤੇ ਸਵਦੇਸ਼ੀਤਾ ਦੀ ਲਹਿਰ ਸ਼ੁਰੂ ਕੀਤੀ। ਅੰਗਰੇਜ਼ ਸਰਕਾਰ ਨੇ ਸਤਿਗੁਰੂ ਰਾਮ ਸਿੰਘ ਜੀ ਨੂੰ ਭੈਣੀ ਸਾਹਿਬ ਤੋਂ ਬਾਹਰ ਪ੍ਰਚਾਰ ਕਰਨ ‘ਤੇ ਪਾਬੰਦੀ ਲਾ ਦਿੱਤੀ ਸੀ, ਪਰ ਉਨ੍ਹਾਂ ਨੇ ਉਹ ਪਾਬੰਦੀ ਤੋੜ ਕੇ 1867 ਈ. ਵਿੱਚ ਅੰਮ੍ਰਿਤਸਰ ਅਤੇ ਆਨੰਦਪੁਰ ਵਿੱਚ ਜਨ ਜਾਗਰਣ ਲਈ ਸਭਾਵਾਂ ਕੀਤੀਆਂ। ਦੇਸ਼ ਦੀ ਆਜ਼ਾਦੀ ਲਈ ਉਨ੍ਹਾਂ ਨੇ ਨੇਪਾਲ ਅਤੇ ਰੂਸ ਨਾਲ ਸੰਪਰਕ ਸਥਾਪਿਤ ਕੀਤਾ, ਕਸ਼ਮੀਰ ਰਾਜ ਵਿੱਚ ‘ਕੂਕਾ ਪਲਟਨ’ ਦੀ ਸਥਾਪਨਾ ਕੀਤੀ। ਅੰਗਰੇਜ਼ਾਂ ਵਿਰੁੱਧ ਬਗਾਵਤ ਕਰਨ ਦੇ ਦੋਸ਼ ‘ਚ ਸਤਿਗੁਰੂ ਜੀ ਨੂੰ ਜਲਾਵਤਨ ਕਰਕੇ ਰੰਗੂਨ ਭੇਜ ਦਿੱਤਾ ਗਿਆ। ਨਾਮਧਾਰੀ ਸਿੱਖਾਂ ਨੂੰ ਸਖ਼ਤ ਸਜ਼ਾਵਾਂ ਦਿੱਤੀਆਂ ਗਈਆਂ, ਉਨ੍ਹਾਂ ਦੀਆਂ ਜਾਇਦਾਦਾਂ ਜ਼ਬਤ ਕਰਕੇ ਨੀਲਾਮ ਕਰ ਦਿੱਤੀਆਂ ਗਈਆਂ। ਬਹੁਤ ਸਾਰੇ ਨਾਮਧਾਰੀ ਸਿੱਖਾਂ ਨੂੰ ਪੱਥਰ ਬੰਨ੍ਹ ਕੇ ਸਮੁੰਦਰ ਵਿੱਚ ਡੁਬੋ ਕੇ ਮਾਰ ਦਿੱਤਾ ਗਿਆ।
ਰਾਸ਼ਟਰੀ ਗੌਧਨ ਮਹਾਸੰਘ ਵੱਲੋਂ ਕੀਤੇ ਜਾ ਰਹੇ ਇਸ ਪ੍ਰੋਗਰਾਮ ਵਿੱਚ ਨਾਮਧਾਰੀ ਸਿੱਖਾਂ ਵੱਲੋਂ ਵਿਸ਼ਵ ਸ਼ਾਂਤੀ ਅਤੇ ਗੌ-ਰੱਖਿਆ ਲਈ ਹਵਨ ਯੱਗ ਵੀ ਕੀਤੇ ਗਏ।
Leave a Reply